Politik konfidansyalite

1. Kiyès k ap trete done ou yo

ZOUTI S.A., Okap, Ayiti. Pou nenpòt kesyon sou paj sa a oswa sou done ou : contact@zouti.ht · (+509) 36 92 4292.

2. Sa nou kolekte

Kont ou : non, adrès imèl, telefòn, vil, non antrepriz la, lang ou chwazi a. Modpas la pa janm sere an klè — sèvè a kenbe sèlman yon anprent kriptografik, epi ou pa ka retounen nan modpas la apati anprent sa a.

Aktivite ou sou sit la : kreyasyon kont, koneksyon, abònman, telechajman. Jounal sa a la pou reponn « kiyès ki fè kisa, epi kilè », li pa la pou fè pwofil ou.

Sa ou voye ban nou : mesaj nan fòmilè kontak la, enskripsyon nan bilten nouvèl la.

Sou plan teknik : adrès IP ak kalite navigatè nan jounal sèvè a, jis tan pou nou asire sekirite a epi konprann yon pàn.

3. Done boutik ou a

Chak antrepriz resevwa pwòp bazdone pa li, fèmen sou sèl kont li. Done ou antre ladan yo — kliyan, pasyan, elèv, vant, ekriti — se pou ou.

ZOUTI ebèje yo. Li pa li yo, li pa revann yo, li pa fè kòmès ak yo epi li pa sèvi ak yo pou antrene anyen. Ekip nou yo antre ladan sèlman si ou mande yo pou yon sipò, epi sèlman pandan tan sipò sa a.

4. Poukisa nou trete yo

Pou kenbe kont ou ak aksè ou yo ; pou egzekite abònman ou pran an epi bay resi ; pou ede w lè ou ekri nou ; pou sekirize sistèm yo epi jwenn kote yon pwoblèm soti ; pou voye ba ou, si ou te mande sa, nouvèl vèsyon nou yo.

Nou pa sèvi ak done ou pou piblisite, ni pou fè pwofil, epi nou pa vann yo bay pèsonn.

5. Ti fichye koneksyon (cookies)

Twa sèlman, epi okenn ladan yo pa piblisitè :

sesyon an : li kenbe ou konekte ; li disparèt lè ou dekonekte ;
lang lan (zouti_lang) : li sonje kreyòl, franse, panyòl oswa anglè yon vizit pou yon lòt ;
tèm nan : klè oswa fonse.

Okenn trakè twazyèm pati, okenn rejis piblisite, okenn piksèl rezo sosyal.

6. Ak kiyès nou pataje yo

Ak ebèjè nou an, pou sèvis la ka mache. Ak operatè peman ou chwazi a — MonCash, NatCash, bank ou — sèlman pou règleman an.

Ak yon otorite, si lalwa ayisyen egzije sa nan yon demann regilye. Ak pèsonn lòt : nou pa vann ni nou pa lwe okenn done.

7. Pou konbyen tan nou kenbe yo

Kont lan ak jounal li : toutotan kont lan egziste, epi katrevendis (90) jou apre li fèmen.

Done boutik la : toutotan abònman an ap kouri, epi katrevendis (90) jou pou kite ou ekspòte yo.

Pyès kontab yo : dire lalwa ayisyen mande a. Mesaj kontak yo : de (2) an. Bilten nouvèl la : jiskaske ou dezenskri, ak yon sèl klik depi nan nenpòt voye.

8. Sa ou ka egzije

Wè done nou genyen sou ou ; korije yo ; ekspòte yo nan yon fòma yon lòt aplikasyon ka li ; fè efase yo ; retire konsantman ou pou bilten nouvèl la.

Ekri contact@zouti.ht. Nou reponn anba trant (30) jou. Gen kèk efasman ki rete limite pa obligasyon kontab nou yo : nan ka sa a nou di ou sa ki dwe rete, epi poukisa.

9. Kijan nou pwoteje yo

Echanj yo pase an HTTPS. Modpas yo ache, yo pa janm sere an klè. Chak boutik gen bazdone pa li, fèmen sou sèl kont li : yon antrepriz pa ka li sa yon lòt. Aksè administratif yo nominatif epi yo anrejistre nan yon jounal, epi sovgad yo chak jou — chak èdtan sou òf FULL la.

Okenn sistèm pa enpenetrab. Si gen yon vyolasyon ki touche done ou, nou avèti ou san pèdi tan, ak sa nou konnen an epi sa nou konseye ou fè.